جبهة أنا عارفك,القيادة العامة

لولا سوء الحظ لما كنت مصريا

نبدأ بالجنازة حارة والميت كلب.........بمناسبة الثانوية تخلف والى تعتبر بمثابة العيد القومى للتخلف والجهل والغباء فى البلد العقيمة دية (ماحدش يقولى مصر ولادة) ,كل الفيلم الهندى ده عشان مكان فى حاجة مالهاش لازمة ولافايدة زى البتاعة (للتحقير)اللى بيقولوا عليها جامعة القاهرة ولا عين شمس ولا الزقازيق ولا المنصورة ولا المنوفية ومن دى لدى ياقلبى لاتحزن.
اقتراح مفيد بدل الدوشة دى كلها : تشوف الكلية اللى عاجباك وتطلع على شئون الطلبة فيها ومعاك شوية من خريجين قسم شبرا الخيمة للعلوم التقنية أو أكاديمية الشرطة دراسات عليا وتقفلوا الباب وراكوا وتدوهم الطريحة اللى هيا وتحطوا بصمتكوا عليهم بس ضرورى فى الآخر تراضوهم برشة جريئة (سياسة العصا والجزرة)عشان نفتح صفحة جديدة واسم الباشا التلميذ يتسجل فى الدفاتر ويتعلق فى القوايم ويطلع الكارنيه وبعد بضع سنين هياخد الشهادة يعلقها فى الصالون أو فى القهوة اللى تحت بيتهم ودمتم.
حاجة تانية غيظانى هى الكلام الكتير المجعلص اللى ناس كتير قالته فى حكاية الزيادة السكانيةوفى هذا الموضوع بالذات فأنا وثنى جدا جدا (نسبة للحزب الوثنى) وبقول أن البلد دى فيها ناس كتير مالهومش لازمة وزاحمينها على الفاضى يعنى بصريح العبارة يريت يخلوا عندهم دم ويزقوا عجلهم أصلها مش نقصاهم (ماهو لو كانوا زيادة ولا حتى كمالة عدد كنا أستحملناهم),صحيح أن البلد منهوبة و فعلا مسروقة وحقيقى خربانة أنما بلتأكيد هى بلد فقرانة وعدمانة وكحيانة وشحاتة وزبالة ولا فيها موارد ولا يحزنون وشوية الأراضى الزراعية اللى فيها, الناس اللى مالهومش لازمة بنوا عليها وبوروها وسفلتوها وبعد كده يرجعوا يقولوا مصر كانت سلة الغذاء للأمبراطورية الرومانية (قول للزمان ارجع يازمان), والمصيبة فى صنف من الناس دماغهم جزمة يقال لهم (مبنى للمجهول لمعلومية الفاعل) تنظيم الأسرة وكل أسرة كفاية عليها طفلين أو 3(هبحبها شوية ) يردوا يقولوا حرام, لألألأ مش حرام ده حلال وحلال وحلال,الحرام هو اجراء عملية لربط الحبل المنوى أو قناة فالوب أما وسائل منع الحمل للنساء والرجال فهى حلال.
هيردوا يقولوا تكاثرواتناسلوا ,الزوج والزوجة الذين أنجبا طفلا واحدا فقط هم بهذا الطفل قد تناسلوا وتكاثروا (على أساس أن التكاثر بمعنى التناسل وليس الكثرة) وضرورى أفكرهم بغثاء السيل.

حكاية دير أبو فانا:::::
أولا الأعتداء على أراضى الدولة عادى (ماحدش يعمل فيها مخضوض ومندهش وفين الأنون والكلام ده)
,رهبان ,أعراب,شيوخ,سفير غفير تاجر مخدرات ,مدمن,واحد أجنبى,خليجى ,عيل صغير,لواء سابق أو حالى,أنا بذات نفسى يحطوا أيديهم على فدان أو عشرة أو مليون أراضى دولة أصدق وعادى وبيحصل كل يوم((أنا لسه بدور على حتة احط ايدى عليها,عارفين الزاوية 90 درجة اللى فى أقصى الجنوب الغربى لمصر خلف هضبة الجلف(بكسر الجيم) الكبير,الحتة دى داخلة دماغى وبفكر اعمل فيها مشروع الجولف الكبير(بضم الجيم)والزباين موجودين المتمردين فى دارفور وتشاد والقوات الدولية فى دارفور والفرنسية فى تشاد وممكن نعمل قاعة مؤتمرات لمفاوضات السلام يعنى كمان سياحة مؤتمرات ده غير الأخوة الليبين والخلايجة الى بيحبوا الصيد والصحراء ولايسعنى الا أن أقول عمار يامصر)),نرجع لموضوعنا.
المش عادى فى الموضوع هو أن الأعراب اللى مابنقراش عنهم غير فى صفحة الحوادث يابيهربوا مخدرات من اسرائيل أو بيهربوا الأفارقة الى اسرائيل أو بيزرعوا المخدرات فى سينا اللى الداخلية ماتقدرش توصلها غير بالطيارات الهوليكوبتر وفى حراسة الجيش أوبيقطعوا الطرق الصحراوية ويسرقوا العربيات(قريت حاجة زى كده قريب) هؤلاء هما اللى غضبوالما الرهبان حطوا ايديهم على أملاك الدولة يعنى الأعراب هم اللى بيدافعوا عن أملاك الدولة وبينفذوا القانون.

نرجع لموضوع الثانوية تخلف وحكاية التسريب: لو نظرنا الى امتحان الثانوية كسلعة فهو سلعة قيمة لها سوقها المتعطش اليها وقاعدة كبيرة من المستهلكين حوالى مئتين الى ثلاثمئة ألف أسرة(خاصة فى المواد الأساسية اللى مافيهاش علمى وأدبى) و المستهلك مستعد لدفع السعر المطلوب بدون مناقشة لعدم توفر السلعة فى السوق بشكل كبير وعدم وجود منافسة(احتكار امتحان الثانوية تخلف هو بالتأكيد أكثر ربحية من احتكار الحديد) ,كما تتوافر لهذه السلعة دعاية وترويج مجانى وبحجم وانتشار هائل فى جميع أنحاء البلاد وبدون تكلفة على المنتج,كما ان اكتساب الأمتحان لصفة الصعوبة والتعقيد والطول يعطى ضمانة أفضل للأقبال وسعر أعلى.
وبذلك يكون من يمتلك امتحان الثانوية تخلف قبل 24 ساعة من بدايته لديه كنز غالى,وحتى من يمتلكه قبل ساعة واحدة من بدايته لديه فرصة لتحقيق مكاسب غير قليلة.
أما بالنسبة للكشف عن عملية التسريب فهو على ماأعتقد نتيجة لتصارع الموزعين على الفوز بحصة أكبر من السوق.
وبصورة جدية أقترح انشاء شركة مساهمة بمسمى الشركة الوطنية للتسريب يتم طرح أسهمها فى بورصة الأوراق الماليةوتدخل فيها وزارة التربية والتعليم بحصة رئيسية, وتتولى هذه الشركة عملية التسريب وضمان جودة واعتمادية الأمتحانات المسربة ونماذج الأجابةومواجهة محاولات غش التسريب.
وعن طريق هذه الشركة تضمن الدولة تحصيل الرسوم والضرائب عن الأرباح الناشئة عن نشاط التسريب.

ملاحظة قانونية:تحتفظ القيادة العامة لمدونة أنت عارفنى وأنا عارفك الألكترونية ,جبهة أنا عارفك بجميع وكامل حقوق الملكية الفكرية لأى أطروحات أو مشاريع أومقترحات أو أفكارأو ماشابه ذلك فى جميع البوستات الواردة فى أى من أنحاء المدونة,كما تتنصل جبهة أنا عارفك من أى قول أو فكر يغضب أيا من الأخوة الأحباء وقانا الله واياهم شر القتال وتحمل مسؤليته كاملة غير ناقصة لجبهة أنت عارفنى.
وبعوده الأيام