خالتى وخالتك واتفرقوا الخالات

سيب وأنا سيب
بص كده على خريطة مصر وشوف مساحتها هتلاقى مساحتها حوالى مليون كم مربع يعنى تفصل 3دول مريحة .
كل دولة هتكون مساحتها حوالى 320 ألف كم مربع.
الموضوع بالظبط كأن أدامك على السفرة 3 أصناف وهتغرف 3 أطباق ,كل طبق حتة من كل صنف.
يعنى كل دولة هتاخد حتة من الدلتا وحتة من الصحراء الغربية وحتة من الشرقية,وسينا فعلا مقسومة على ثلاثة شمال ووسط وجنوب,ووادى النيل وقناة السويس هيتقسموا بالطول على تلاتة.
يعنى النيل وقناة السويس(أهم حاجتين على السفرة)هيكونوا بتوع الكل والكل ليه فيهم.
السؤال : ليه 3 دول مش اتنين ومش 4أو 5.
السوق عندنا محتاج 3 دول بالتحديد
أولا: دولة اسلامية دستورها القرآن تطبق الشريعة وتقيم الحدود يحكمها أمير للمؤمينين أو خليفة للمسلمين تضم المجاهدين وتغزو الكافرين وكل الكلام والحاجات اللى زى كده يكون مكانها في الدولة ديه.

ثانيا: دولة مسيحية كنسية وبالتالى لايكون في اضطهاد ولاأسلمة ولا أقلية ولا أي حاجة من الكلام ده,دولة قريبة من الفاتيكان بس أوسع وأكبر .

ثالثا:دولة مدنية ليبرالية ,ديموقراطية,حرة,يتم فيها فصل الدين عن الدولة ,فيها مجتمع مدنى وحقوق انسان وحيوان وحقوق مرأة وحقوق طفل وبقية الأصناف وكل الحاجات والمحتاجات اللى زي كده.

الدولة المدنية أعتقد مكانها يكون في النص بين الدولتين التانيين عشان مايحصلش بينهم حاجة.
طب بالنسبة للدولة الحالية هنتصرف فيها ازاي؟

نتفق مع مكاتب محاسبة ومحاماة تعمل جرد وتحصر الفلوس وتقيم الممتلكات والأصول وتكتب العقود ونسجل ال3 دول فى الشهر العقارى ,ونقسم الفلوس على تلاتة بالتساوى.
بس الموضوع ده والأجراأات بتاعته محتاجة فلوس وصرف وتكاليف لغايةمايخلص ونقسم.
محلولة ؟
احنا عندنا 3 أهرامات ,بلاش الكبير بتاع خوفو ولا الصغير بتاع منقرع ,خلينا فى الوسطانى بتاع خفرع نفكه طوبة طوبة ونعمل مزاد على كل طوباية ,واحسبها أنت وابقى تعال قولى ان عرفت تحسبها.
أظن كده ماعدش فيه مشكلة.
وبذلك فان كل نفر ونفرة مواطن ومواطنة ,شيخ وأمة في أرض مصر هيريح ويستريح ويعيش حياته هانئا مطمئنا في دولة على مزاجه وعلى كيف كيفه.

للحجز فى أى من الدول المذكورة : يرجى الكتابة فى c_box
ولأقتراح دول جديدة : يرجى كتابة كوممنت....